დეტალური აღწერა:
„ლიტერატურული ოდისეა“ ქართველ მკითხველს სთავაზობს ნობელის პრემიის ლაურეატი ბრიტანელი მწერლის, ვ. ს. ნაიპოლის (ვიდიადჰარ სურაჯპრასად ნაიპოლი, 1932-2018) ნაწარმოებს “თავისუფალ ქვეყანაში”.
სკოლის დამთავრების შემდეგ მომავალმა მწერალმა ოქსფორდის უნივერსიტეტში ინგლისური ლიტერატურის შესასწავლად სტიპენდია მიიღო და სწავლის გასაგრძელებლად გაემგზავრა. ეს იყო პირველი დიდი მოგზაურობა, დამოუკიდებლად გავლილი 7 000 კილომეტრი, რამაც ახალგაზრდაზე წარუშლელი შთაბეჭდილება მოახდინა და მთელი დედამიწის შემოვლის საღერღელი აუშალა. და მართლაც, მისი შემოქმედების შთაგონების წყაროდ იქცა სხვადასხვა დროს ინდოეთში, აფრიკაში, აზიის ისლამურ ქვეყნებში სტუმრობა, ასევე ანტილის არქიპელაგის კუნძულებზე გატარებული ბავშვობა.
„თავისუფალ ქვეყანაში“ მოიცავს პროლოგს, სამ მოთხრობასა და ეპილოგს. მოთხრობების გმირები სხვადასხვა ქვეყნის შვილები არიან, განსხვავებული მიზეზების გამო უცხო ქვეყანაში აღმოჩენილები. არის კი ამ ადამიანების მოგზაურობა ის გზა, რომელიც მათ თავისუფლებას აპოვნინებს, თუნდაც უცხო მიწაზე? და მაინც, რა არის თავისუფლება და როდის არის ადამიანი თავისუფალი? ამ კითხვებზე დააფიქრებს მკითხველს ვ. ს. ნაიპოლის მოთხრობების ეს კრებული.